దర్బార్ మైసమ్మ అమ్మవారికి ప్రభుత్వ పట్టు వస్త్రాల సమర్పణ
కార్వాన్ లోని ప్రముఖ ఆధ్యాత్మిక క్షేత్రం శ్రీ దర్బార్ మైసమ్మ ఆలయంలో బోనాల ఉత్సవాల సందర్భంగా ఆదివారం రాష్ట్ర ప్రభుత్వం తరఫున రాష్ట్ర వైద్య, ఆరోగ్య శాఖ మంత్రి దామోదర్ రాజనర్సింహ అమ్మవారికి అధికారికంగా నూతన పట్టు వస్త్రాలను సమర్పించారు. ఆలయానికి విచ్చేసిన మంత్రికి ఆలయ అర్చకులు, దేవాదాయ శాఖ అధికారులు పూర్ణకుంభంతో స్వాగతం పలికారు. అనంతరం అమ్మవారికి పట్టు వస్త్రాలు సమర్పించి ప్రత్యేక పూజలు చేశారు.ఈ సందర్భంగా మంత్రి మాట్లాడుతూ.. ఆషాడ మాసంలో జంట నగరాల ప్రజలు బోనాల పండుగను ఎంతో వైభవంగా జరుపుకుంటారని అన్నారు. దర్బార్ మైసమ్మ అమ్మవారికి పట్టు వస్త్రాలు సమర్పించడం అదృష్టంగా భావిస్తున్నానని చెప్పారు. ఈ ప్రాంతంతో తనకు 45 ఏళ్ల అనుబంధం ఉందని, దివంగత జగత్, ఆలయ చైర్మన్ అమర్ సింగ్ లతో ఎన్నో ఏళ్లుగా అనుబంధం ఉందని తెలిపారు. అమ్మవారి ఆశీస్సులతో జంట నగరాలు, తెలంగాణ రాష్ట్రం సుభిక్షంగా ఉండాలని ప్రార్థించినట్లు వెల్లడించారు.తర్వాత వైద్య, ఆరోగ్య శాఖ ఆధ్వర్యంలో భక్తులకు అత్యవసర వైద్య సేవల కోసం ఏర్పాటు చేసిన మెడికల్ క్యాంపును మంత్రి ప్రారంభించారు. భక్తులు, వైద్య సిబ్బంది, ఆశా వర్కర్లతో మాట్లాడారు.కార్యక్రమంలో ఆలయ చైర్మన్ అమర్ సింగ్, దేవాదాయ శాఖ అధికారులు చంద్రకళ, సులోచన, రెవెన్యూ అధికారి వెంకటేశ్వర్లు, పోలీస్ అధికారులు, కాంగ్రెస్ స్థానిక నాయకులు పాల్గొన్నారు.
